إيه أفضل سيارة ممكن أشتريها جديدة أو مستعملة دي خلاصة الموضوع بعد بحث مستمر

مع إني بحب المقدمات بس عارف إن اللي بيشتري سيارة عايز اللي يقوله اشتري السيارة دي مش بس كدة ده محتاج كمان يقنعه بيها المهم من واقع خبرتي المتواضعة جدا في عالم السيارات حقولكم عالخلاصة في الموضوع وكل واحد يشوف الخلاصة اللي تتناسب معاه حسب الاحتمالات التالية 

1 - لو عايز عربية وخلاص تمشي حالك وتقضي شغلك ومعاك 25000 فقط دور علي حاجة فيات 128 حالتها تكون جيدة ومتفكرش كتير وهاتها بسرعة قبل ما الفلوس تنصرف

2- لو عايز عربية وخلاص تمشي حالك وتقضي شغلك ومعاك 50000 دور علي هيونداي اكسيل تكون حالتها حلوة حيتبقي معاك كم الف حاول تضبط بيهم العربية

3- لو عايز عربية وخلاص تمشي حالك وتقضي شغلك ومعاك 75000 هاتلك سيارة دايو أو فيرنا ومتحاولش تحلم بعيد عن السيارتين دول والبادئ أظلم 

4- لو عايز عربية  تمشي حالك وتكون معقولة و معاك 100000شوفلك لانسر حتي موديل 2000 

5- لو معاك 125000 لو عايز نصيحتي وانت مغمض هات صني حتي موديل 2012 عايز حاجة تانية هات النترا حتى موديل 2011 

6- لو معاك اكثر من كدة يعني من فوق ال 150000 متحاولش تدور علي موديلات في السيارات المعروفة أقل وأرخص في الموديل فكر في الجديد احسن يعني byd f3 أو شيري 

7- لو معاك 175000 تعالي علي نفسك شوية هات لوجان أحدث موديل 

8 - لو معاك فوق ال 200000 الله يعينك الموضوع كدة أصبح فوق قدراتي لأنك حتتعبني وانا حطلع عينك وانا حقول رايي وانت حر في حالتك دي هم ثلاثة خيارات والثلاثة حتيجي علي نفسك فيهم والثلاثة حالات هم 

1- تشتري النترا hd جديدة 

2- تدفعم مقدم في سيارة كيا سيراتو الفئة الأولي وتقسط الباقي أو تشتريها بنظام المرابحة من أي بنك

3- تدفعهم مقدم سيارة النترا Ad الشكل الجديد وتعيش حياتك وتقسط بردو الباقي 

ومش عايز حد يقوللي انت ظلمت سيارات كتير ومش عايز حد بردو يقوللي علي اي اساس لأن الاساس واحد لينا كلنا لكن اللي مش عاجبة وشايف نفسه شوية وعايز يتمنظر حقوله انت مكانك مش في المقال ده عليك وعلي سيارات المرسيدس والأودي وابعد عننا وسيبنا في حالنا احنا عايزين منظرة بس علي أدنا 

واي استفسار أنا جاهز للرد عليكم في التعليقات لان كتبت بسرعة لضيق الوقت وانشغالي

شارك هذا الموضوع

آراء الأعضاء

مواضيع مميزة