كل المعلومات عن فنون جميلة عمارة واسئلة اختبار قدراتها

  • الكاتب boky
  • تاريخ اﻹضافة 2017-06-20
  • مشاهدة 43

فنون جميلة عماره هيا قسم جوا فنون جميله بيقبل من #علمى_رياضه فقط
بياخد مجموع كام ؟ تقريبا نفس مجموع هندسه ان مازادش حاجه بسيطه او قل حاجه بسيطه

طيب فنون جميله عماره أحسن ولا هندسه قسم عماره؟

الاتنين زي بعض يفرق بس ان الدراسة المعمارية فى فنون جميله بتدرس معاها جانب فنى وجمالى بالأضافه للجانب الوظيفي 
ودي طبعا ميزه هايله ان المعمارى يكون عنده حس فني وجمالى

طب يعنى أدخل انهي ؟؟ لو انت التارجت بتاعك تدرس عماره من البدايه يبقى فنون جميله عماره لكن لو لسه عايز تدخل هندسه وتختار بين الأقسام فخلاص ماتحطهاش في دماغك

أمتحان قدرات فنون جميلة عماره زمان وبعد التغيير اللى حصل السنه اللي فاتت

نتكلم عن ما قبل التغير 
الأمتحان كان عباره عن سؤالين 
اول سؤال وهو سؤال المنظور الهندسي كان بيطلب منك رسم لمبنى او اى شيء عن طريق المنظور الهندسي 
أشهر الأمثله اللي جات فى الأمتحانات (ارسم مسرح_مدرسه_نصب تذكارى_بيت_واجهه سينما_مستشفى_تجمع سكني ) أغلبها مبانى
وطبعا كل نفس طريقه الرسم مع اختلاف التفاصيل الخاصه بكل مبنى

طيب أنواع المنظور الهندسي 
منظور نقطه واحده ومنظور نقطتين
95% من الأسئله كان بيجى على منظور النقطتين 
طبعا انت مستني أقولك انك تقدر تتعلم المنظور فى ربع ساعه من على اي فيديو من اليوتيوب ولو انت دماغك عاليه وخيالك واسع هتبدع

لو حبيت تعمل سيرش بالأنجلش هتكتب two point prespective
one point prespective 
وجوجل مليان نماذج صور للأمثله الى قولتها فوق واليوتيوب

السؤال التانى كان سؤال الثقافة المعماريه 
وطبعا المفروض ان انت عاوز تدرس عماره فأكيد انت مهتم بالمباني المعماريه فبيجبلك صور ويقولك المبنى ده فين واسمه ايه او يجبلك اسمه ويقولك فين او يطلب اى معلومه عامه عن المبنى اللي جايبهولك 
طبعا السؤال ده محتاج ثقافه عامه بس ماتقلقش الكليه كل سنه بتنزل كتاب فيه المنهج اللي هيا بتجيب منه الأمتحان وبتجيب فيه جزء الثقافه المعماريه اللي المفروض انك تذاكره وطبعا السؤال ده مش بيتشرح في أى سنتر

ده لينك هنحمل منه فايل فيه اهم المبانى اللي بتيجي في سؤال الثقافة المعمارية
على فكرة السؤال ده مازال مكمل معانا فى المنهج الجديد اللهم بلغت :D

www.mediafire.com/…/%D8%A7%D9%84%D8%AB%D9%82%D8%A7%D9%81%D8…

بمناسبه الكتاب اللي بتنزله الكليه مكانش ليه اي لازمه محدش كان بيجيبه لأن الأمتحان كان يعتبر ثابت مش بيتغير سؤال المنظور وسؤال الثقافه المعماريه اللي مش مهم اوي لأن اضعف الأيمان لو معرفتش تجاوبه سؤال المنظور درجاته أعلى 
الكتاب ده أهميته ظهرت السنه اللي فاتت لما نزل والمنهج طلع متغير :D

طب أيه هو المنهج الجديد ( قبل ما أتكلم فى تفاصيل المنهج الجديد أو الأمتحان الجديد متهملش الجزء اللي فوق لأن وارد جدا يجي سؤال منظور عادي هوا متلغاش هوا أتطور بس )

من أول السنه اللي فاتت بدأ يدخل فى الأمتحان طبيعه صامته :D
الأمتحان بقا شبه فنون تطبيقيه وفنون جميله 
يعني أيه اصلا طبيعه صامته ( اعتبارا ان اللفظ جديد عليكو) هنعتبر أنها الأشكال الهندسيه بالتظليل بتاعها
(المكعب - الهرم- الكوره -المخروط-الأسطوانه) السؤال بقا يجيلك يقولك اعملى تكون طبيعه صامته واعمله تظليل 
هيا هيا لو جابلك سؤال فيه صوره تفاحه وفازه وقالك ارسمهم عادى بترد الشكل اللي قدامك لأصله الهندسى يعنى ايه يعنى التفاحه عباره عن كوره :D والفازه حسب شكلها بقا اسطوانه مثلا او نصها من تحت كره ومن فوق أسطوانه عادى جدا وانت بترسم الكلام ده هتحط فى دماغك بردو المنظور لان اى حاجه فى الدنيا بتترسم بقواعد المنظور تمام :D

تانى سؤال وده اللي الناس اتخضت منه كان عباره عن اشكال هندسيه مركبه كأنك مركبه وطلب منك انك تنقلها في كراسه الأجابه 
هنزلكوووو صور كتير عن الأشكال دى بالأضافه ان فى فايل اهو فى تظليل الاشكال الهندسه ونماذج طبيعه صامته والأشكال المركبه دي
(صيغه تانيه ارسم شويه اشكال هندسيه متداخه ومتكرره بمقاساتمختلفه وبين الظل والنور)

كل الحاجات الى جوا الفايل دي من كتاب الكليه 
( بخصوص الكتاب لو اشتريتوه هتتخضوه شويه لانه كبير بس كله بيلعب فى منطقه المنظور والتظليل والتراكيب والأشكال الهندسيه )

https://mfi.re/file/m3h1f9v6fkquz39/Doc1_%281%29.pdf

السؤال التالت كان سؤال التحليل المعماري كان سؤال سهل بس الناس اتخضيت من شكله 
بيجبلك مبنى ويقولك حلل الكتله المعماريه يعنى لو جبلك الأهرام كتلتها المعاريه ايه اكيد هرم يعنى
برج القاهره كتلته العماريه عباره عن شكل اسطواني والقاعده بتعته
جبلك جامع مثلا ليه قبه هيبقى التحليل المعمارى بتاعه مكعب وفوقيه نص دايره 
بكل بساطه بتشيل التفاصيل وترد الكتله المعماريه لأصلها الهندسى اللي هو الأشكال الهندسيه الأساسيه

السؤال الرابع سؤال الثقافه المعماريه واتكلمنا عنه فوق السنه اللي فاتت اتكرر كتير بوابه النصر والأهرمات

شارك هذا الموضوع

آراء الأعضاء

مواضيع مميزة