1- إنت إيه ؟

  • الكاتب Rafik Yassa
  • تاريخ اﻹضافة 2017-03-20
  • مشاهدة 12

إنت إيــــــــــــــــــــــــــــه ؟

                                                                                             بقلم رفيق يسي

أنا شاب زى كل الشباب بدور على التميز و الشهرة .عايز يكون معايا فلوس كتير . عايز أشتغل بمرتب كبير . عايز يكون عندى عربية أحدث موديل و شقة تمليك في أسرع وقت . عايز أحب بنوتة حلوه تحبنى و نكون متفاهمين و نتجوز بسرعة عشان نكون أسرة سعيدة . عايز اعيش أحسن لأني إنسان زى كل الناس أو أنا عايزه أكون إنسانة ناجحة و إرتبط بشخص ناجح و متميز .

إستنوا شوية و إفهموا !!!

إنت إيه ؟ عايز .. عايزه . طيب و دورك إنت تجاه نفسك عشان توصل لكل اللى انت عايزه ده إيه ؟؟؟

مش المفروض تكون عارف موهبتك ايه ؟ قدرتك ؟ مميزاتك ؟ نقاط ضعفك عشان محتاجة منك تقويها وتقدر تحقق اللى إنت عايزه ؟

ربنا خلقنا كلنا متفردين و متميزين .. خلق في كل واحد فينا قدرات و مواهب لو عرفتها هتكون مبسوط و هتبسط اللى حواليك . و أول و أهم قدرة هى قدرتك على التفكير بعقلك الواعي و عقلك الباطن . بس المهم إزاي تستخدم تفكيرك بعقلك ده صح .. المهم إنك تشغل عقلك مش سايبه كده و خلاص ماشي زى باقى الناس .. عايش زى اللى عايشين و عايز كل حاجة زى كل اللى عايزيين .

و مسألتش نفسك هتقدر توصل لكل اللى إنت عايزه ولا الموضوع محتاج معجزه ؟؟؟

أه الموضوع محتاج معجزه .. معجزه فى تفكيرك .. معجزه فى إسلوب حياتك .. معجزه فى إرادتك ..

أقولك حاجة مهمه .. المعجزة موجوده .. المعجزة هو إنتَ .. هو إنتِ

ربنا خلقنا بمعجزه .. خلقنا بقدرات و مواهب فائقة .. بس يا ترى مين فينا بيقدر يستغل و ينمي قدراته

و يحقق المعجزه ؟؟؟

عندك أمثلة كتير أولها الدكتور احمد زويل رحمه الله – الحاج محمود العربي – الدكتور مجدى يعقوب – السباح خالد حسان عابر المانش برغم انه من زوى القدرات – المذيعة رضوه من زوى القدرات الفائقة – بطل التنس طاولة ابراهيم حمديتو الذى يلعب و المضرب في فمه – الفنان التشكيلى رضا فضل الذى يرسم و الفرشاة في أرجله .

و غيرهم كتير .. كل دول عرفوا يستخدموا قدراتهم اللى ربنا خلقها فيهم .. عرفوا يحققوا المعجزة ..

إنت كمان تقدر .. إنت كمان مميز

لأن ربنا خلقك مميز لأنه ميزك عن كل المخلوقات بعقلك و قدرة تفكيرك .. هتقلى الظروف و البيئة المحيطة و التربية ؟ هقولك كل الأسماء اللى كتبتها إتولدوا زيك و زى كل الناس عاديين و لكن هم إختاروا أن يكونوا متميزين .. هم أرادوا إنهم يكونوا .. أرادوا إنهم يكون ليهم كيانهم ضمن الكينونة الإنسانية ..

أختم كلامى معاكم بمقولة مهمة جداً  

 " سيذكر التاريخ يوماً أنك حققت أهدافك و إن تراجعت فإعلم أنك الخاسر "

أتمنى ان كل الشباب يكون لهم بصمة فى التاريخ و يحفروا أسمائهم بحروف ذهبية

عرفت معنى سؤالى اللى سألته فى الأول

إنت إيــــــــــــــــه ؟

                                                             المدرب رفيق يسي

شارك هذا الموضوع

آراء الأعضاء

الأوسمة

مواضيع مميزة