شارك هذا الموضوع

بالبلدي .. ليه مش هشمت في حرايق اسرائيل!

بالنسبة لموضوع الحرايق في اسرائيل لفت نظري بعض الناس اللي ردت الموضوع لأساس ديني وان دا حصل بسبب منعهم للأذان وهكذا وفرحانين وشمتانين بالوضع .. من كل النواحي غالبا انت بلحة لو بتفكر بالشكل دا بس خلينا ناخدها من ناحيتين ..


من ناحية منطقية انت وقعت في مغالطة منطقية اللي هي المغالطة البَعدية posteriori fallacy .. ببساطة المغالطة معناها افتراض ان شيء هو سبب شيء تاني لمجرد انه حصل بعده .. س حصل بعد ص .. اذن ص هو سبب س .. هنا احنا خرجنا من مجرد الارتباط correlation في المكان والزمان لدايرة السببية causality غير المبررة .. فطبيعي ان اي حدثين يرتبطوا في الزمان ويحصلوا في اسبوع واحد، او في المكان ويحصلوا في نفس البلد .. لكنه تفكير بدائي جدا لما تقول ان واحد سبب والتاني نتيجة له لمجرد الارتباط دا لانه بديهي انك عشان تثبت السببية محتاج عدد كبير من العينات يمثل س وكذلك ص، وفي كل مرة عينة س بتحصل بعد عينة ص وبنفس وتيرة الارتباط الزماني والمكاني وبتحاول تلغي اي سبب يكون مؤثر في النتيجة ولحد ما تخلص كل عينات س و ص على نفس المنوال من غير ولا عينة حادت عنه .. مبروك انت كدا تقدر تقول في علاقة سببية بين س و ص مش مجرد ارتباط. الموضوع عامل بالضبط زي انك لبست قميص معين ورحت الامتحان ونجحت فتقول أنا نجحت بسبب لبسي للقميص دا .. شيء عبيط يعني *


ومن ناحية علمية شوية هتلاقي انك لفتة مش مجرد بلحة .. يعني حرائق الغابات wildfires جزء مهم جدا سواء في علم البيئة أو في التخطيط لانه شيء طبيعي بيحصل باستمرار بشكل طبيعي نتيجة للحرارة مع البرق او الحمم البركانية مثلا، وحوض البحر المتوسط من الاماكن المهددة بحرائق الغابات بنسب عالية بالتالي بديهي تحصل في اسرائيل من وقت للتاني .. ومش هنروح بعيد، في السعودية في الفترة بين 2005 و2010 حصل حوالي 315 حادثة حريق غابات في عسير والباحة اتحرق فيهم حوالي 158811 شجرة، وعندك مثلا سنة 2015 وصلت عدد حرايق الغابات لـ68000 ومساحة الغابات المحترقة حوالي 10 مليون فدان، فاللي هو ان اي حريق محتاج 3 عناصر عشان يقوم .. الوقود او المادة المشتعلة والاكسوجين والحرارة، وبالنسبة للغابات مع جو حار جاف ونقص مطر ورياح شديدة.. وقت ما اتوفرت العناصر دي اعتبر القرموطي قال اشوفها بتولع حالا، فهتلاقي حالات كتير زي روسيا 1915 او مثلا امريكا 1988 واللي سببت تصاعد 1.7 مليون طن غبار جوي او عوالق و13.6 مليون طن اول اكسيد الكربون و0.7 مليون طن ميثان ... رصة الانبعاثات اللطيفة دي بتفكرنا دايما بالجرس الاحمر .. الكوكب يحتضر .. الاحتباس الحراري والتغير المناخي والموضوع أشبه بدايرة مقفولة .. تحصل حرايق غابات فتتصاعد الغازات الدفيئة وتقل المساحة الخضرا اللي بتشتغل كفلاتر للغازات دي فترتفع الحرارة على الكوكب بيصاحبها جفاف واللي بدورة بيسبب حرايق غابات أكتر مش شرط في نفس المكان. 
حرايق الغابات كانت لفترة طويلة شيء كويس بالنسبة للنظام البيئي لانه كان بيخلص الغابات من حشرات ضارة وكذلك بواقي الأشجار اللى كانت على الأرض واللي بتمنع نمو حشائش وحاجات مهمة للغابة دي وكانت بتحصل بشكل معقول عموما من ناحية الكيف أو الكم، لكن بعد الأنشطة البشرية والتغير المناخي بدأت تحصل أنواع مختلفة من الحرايق صعب السيطرة عليها وبتكون نتائجها كارثية خصوصا لتأثيرها على التربة ومصادر المياة في مناطق مجاورة، وأحيانا الحريق بيعدي نطاق الغابة زي ما في 2015 حرايق الغابات طالت 4636 مبنى وسببت خساير كتير لكن تظل الخسارة الأكبر هي التغير المناخي، ففي القرن اللي وصل ارتفاع الحرارة لحوالي 1.2 درجة سيليزية .. على نفس الوضع مع الوصول لارتفاع 2 درجة دمياط هتغرق وابقوا شوفوا بعد كدا هتاكلوا مشبك منين. **


بالمناسبة اعتقد فلسطين نفسها ساعدت اسرائيل في الاطفاء المرة دي زي ما ساعدتها قبل كدا في 2011 .. الفرق ان في ناس بتسمع صوت عقلها وبتنحي الخلافات العقائدية على جنب وقت ما نكون كلنا في مركب واحد بيغرق بينا كلنا. وبالنسبة للشماتة في موت حد فانت اكيد مش هتشمت في الـ9 اللي اتصابوا في حرايق السعودية، فخلي انسانيتك صفة مطلقة وكيل بمكيال واحد. وأخيرا الله يفعل ما يريد، فلا تفسروا أفعال الله حسب أهوائكم.

آراء الأعضاء

مواضيع مميزة

انشر مواضيع واحصل على ربح فوري