شارك هذا الموضوع

لية يابلدى مفيش مكان عندك للفقير ولامكان لموظف عنده ضمير

نداء الى مصر

أسف يامصر انى بقولك كده

بس أنا خايف على الحب الى جوايا …عاوزين نرتاح فيكى ..نرتاح بيكى …احنا صحيح تعبنا لكن لسة عاوزينك وحابينك وشارينك علشانا و علشان ولادنا

لية يابلدى مفيش مكان عندك للفقير ولامكان لموظف عنده ضمير. فيه ناس فيكى يابلدى مش عارفين يتعالجوا علشان المستشفى غالية عليهم وولادهم ممكن يموتوا فيه ناس فيكى يابلدى بيخافوا الصبح يطلع عليهم من هم الديون الى شايلينها فيه ناس فيكى يابلدى بتنبش فى صناديق الزبالة فيه ناس فيكى يابلدى مش لاقية سقف يحميها .فيه ناس فيكى يابلدى كل احلامها انها تعيش فى أمان يعنى مش عاوزة تروح مارينا و لا نفسها فى فيلا و لا عربية تتفسح بيها ناس خايفة على ولادها لحسن يجوعوا ناس مش لاقية حتى الغطاء ليهم ناس بس عاوزة تاكل و تعيش.

يامصر هم دول ناسك الطيبة الى كل أملها يكون ليهم نصيب فيكى ,نصيب فى خيرك ,نصيب فى زرعك ,نصيب فى حبك ناس نفسها تشوف خيرك من غير رشاوى و مسكنة ولا محسوبية من غير طبل وزمر للحاكم. ناس بتدور على أى فرصه علشان يلاقوا نفسهم لكن بمنتهى السهوله بتسدى يامصر كل أبواب الأمل فى وشوشهم الشابة الى عجزت من كثر الهموم. كم واحد عاطل فيكى ؟؟؟ كم شاب عدى الثلاثين و مش عارف يشتغل و لا يفتح بيت؟؟؟ كم أب عاوز يسيبك و يسافر علشان يوفر لبيته العيش؟؟؟ كم وكم وكم ؟؟؟؟

ليه يامصر سلمتى نفسك للى سارقينك ,للى ناهبينك ,للى بايعينك ….وخلتيهم يتحكموا فينا..بقولك ايه يامصر ….هو مش كفاية بقى كفايه يامصر بجد تعبنا هو صوتنا مش عالى علشان تسمعينا .. كفايه يامصر من الظلم هلكتينا بصراحة هقولهلك كفايه يامصر أحنا بجد استكفينا وياريت تقوليلى بجد هو انتي معانا ولاعلينا. وبعدين يامصر هنشوف أيه تانى ظلم وظلام و غلاء و جشع و قمامة فى الشوارع وفساد و تكدس فى المواصلات و أهانة …عندك ايه تانى ؟؟ شوفى النهاردة كم واحد بيقول أنا زهقت من البلد دى …أنا قرفت من العيشة في بلدي”" ليه يامصر وصلتى ولادك لكده ’ ليه خليتى الظلم و القهر يعمل فى شبابك كده .

يامصر افتكرى ان الناس الى بتحبك عملت علشانك ثورة و ثورة …قالت لكل حاجه غلط لأ .. وعلوا صوتهم و الدنيا كلها سمعتهم.. صوتهم كان عالى علشان دايما صوت الحق عالى و الحق جواهم عمره ماهيموت وقالوا لازم يجيبوا حقك و حقهم ده كله كان علشانك عشان تعيشى علشان دايما تبقى أم الدنيا ….ناس كان شايلين كفنهم على أديهم وبيقولوا فى حبك تحيا مصر ونفديكى بالغالى . وقولنا خلاص البلد هتبقى بلد وهنشوف فيكى عدالة و حرية والأمل كان مالى نفوسنا .هو ليه يامصر الأمل بعيد و مش عاوز يقرب ..هو صعب و لا أنتى متعشمة فينا بزيادة .

يامصر ده أنا كتبتلك واتحسرت معاكى على مصر زمان وحلمت وياكى بعتبة مصر الجديدة …….لا قدرنا نرجعك زى زمان و لا شايفالك بكرة كمان

آراء الأعضاء

مواضيع مميزة

انشر مواضيع واحصل على ربح فوري