شارك هذا الموضوع

مصر الجميله _مصرالعظيمه

  • الكاتب على كمال
  • تاريخ اﻹضافة 2016-10-22
  • مشاهدة 5

Image title

احباط .. اكتئاب .. غضب مكبوت .. وجوه عابسه.. همسات وهمهمات هنا وهناك .هذه هى الحالة العامه لغالبية الشعب المصرى الأن ومن ينكر ذلك أما لا يرى وأما مستغنى وربنا كارمه وولا فارق معاه حال البلد وحال الغلابه اللى بقوا كتير أووووى ، والمستغنيين فى البلد ماشاء الله اما بيمدوا ايديهم فى جيب الغلبان بالعافيه حاجه كده بلطجه اما عاوزين لموأخذه يشربوا شاى لزوم قضاء المصلحه اللى يمين عظيم ماهى ماشيه الا لما يشربوا الشاى ، وأما عن طريق التجار الكفره اللى لا يعرفوا ربنا ولا عندهم لا دين ولا ضمير وتاجروا فى كل شئ حتى قوت الغلبان ، لا رحموه ولا سابوه ياكل العدس والفول اللى طول عمرهم بيسدوا وقت الحاجه ، لاء بل وصل بهم الكفر الى سرقة قمحهم اللى بيأكلهم العيش حاف .اما المستغنيين الكبار ووسع بقى ياعم منك ليه وياستى انتى كمان وأوعوا اسمع او اشوف على وشوشكم حواجب مرفوعه ولا شفايف مقلوبه البهوات اللى لو الواحد فيهم عرق شويه من الحر يتصرفله بدل حر وبدل اسبراى للعرق ، البهوات اللى سايبين البلد تضرب تقلب وسايبين الكلاب تتعلف فى السجون ، وبرضوا سايبين الاهالى المكلومين فى عيالهم يتكووا بنار الهم والحسره .ومش عاوزه اكمل بقى للأخر لا تقولوا انى معاذ الله بحسد الناس على رزقها اللى مابتتعبش فيه خالص والله بس حرام والله العظيم حرام تبقى الدنيا ماشيه كده ناس عايمه ونايمه فى العسل .. وناس الحكومه مستخسره فيهم 50 جنيه زياده وأغلبهم كبار سن ومحتاجين لعلبة الدوا اللى الحمد لله اصبحت هى كمان فى متناول القادرين فقط قصدى الناس المستغنيين اللى مش عارفه ليه عندى احساس كده انهم حاسين انهم فوق الناس ولاويين ذراع الشعب بحاله ولو الواحد فيهم عطس وما اتصرفلوش زياده هايوقف حال البلد اكتر ماهو موقوف .ومع ذلك الشعب طيب وغلبان وعايش ومتحمل زيادات فى اسعار كهرباء وسكت ، نار فى اسعار قوته وقوت عياله وسكت ، حتى الوهم اللى اسمه علاج الغلابه ببلاش كذب وافتراء وكلمة صباح الخير بيدفع عليها فلوس قبل مايقولها ، كل ده وساكت وعنده أمل مصر تبقى احلى ، عشمان ربنا يعوضه خير وليه لاء وهو شعب طيب وياما صبر شعب بيحب رئيسه وبيثق فيه ثقه عمياء وبيصدقه .. أيوه لما الرئيس بيقول اصبروا بنصبر .. لما بيقول اتحملوا بنتحمل .. بنصدقه لأننا سبق ووقفنا كلنا وراه وهو واقف ذى الأسد وبيحمينا وبيحمى البلد من الخونه اللى كانوا هايخربوها .. بس للأسف لم نتوقع أبدا انه هاييجى يوم واللى يتخلى عن الرئيس رجالته وحكومته فنحن جميعا نرى كم المجهود الشاق الذى يقوم به الرئيس هو بيبنى من ناحيه واللى بيبنيه بيهدوه للأسف بتراخيهم وتقاعسهم فى اداء ادوارهم اللى مابقيناش عارفين هى ايه بصراحه ، أوالوزير منه ليه ليها بيروحوا مكاتبهم يعملوا ايه .خلاص الكيل طفح ومافيش مكان او مساحه عند المواطن الغلبان وحتى اللى مش غلبان واللى كان بيتقال عليه من الطبقه المتوسطه الناس تعبت وزهقت وولا حد هنا وولا حد حاسس بمعاناة الناس وأنت سيدى الرئيس من حولك يضعفون موقفك ولو استمر الوضع على ماهم عليه سيقل رصيدك عند الناس .. نعم الشعب بأكمله يحبك ونعم الشعب يرى كم المجهود الذى تقوم به .. لكن الجوع كافر والأحتياج مر ..الناس تعبت ياريس وحكومتك ولا هى هنا ._

آراء الأعضاء

مواضيع مميزة

انشر مواضيع واحصل على ربح فوري